(Actualizado: 24 de abril de 2020)

O Admin que xestiona a World League para o equipo ten que se apuntar a estes dous grupos:

World League Headquarters (só para admins de clubs participantes)

World League (aberto a todos os usuarios de Chess.com)

Na cabeceira do primeiro grupo hai unha ligazón a unha guía cos detalles da WL (World League Guide) e da Chess960 WL (Chess960 World League Guide), onde está actualizado basicamente todo o necesario para os admins encargados de xestionar estas competicións.

En resumo, o máis importante:

A liga está organizada a 9 roldas en formato liga nas divisións A, B e C, que teñen 10 equipos, e en formato suízo a partir da división D nas que xogan 20 ou máis equipos.

No primeiro destes grupos, World League Headquarters, publícase unha noticia anunciando o comezo de cada rolda.

Cada rolda da WL anúnciase nos primeiros días do mes (entre xaneiro e setembro) e os encontros teñen que comezar o día 15 do mes ás 9:00 na hora de San Francisco que é a que se utiliza ao crear os encontros de xadrez diario (xeralmente 18:00 en Galicia agás en marzo 17:00). Isto pode cambiar se algún día realizan algún axuste en Chess.com para utilizar hora local, como xa fixeron nos encontros de xadrez en vivo, pero polo momento é así.
Cada rolda da Chess960WL anúnciase uns días despois do día 15 e os encontros teñen que comezar o último día do mes, de novo ás 9:00 hora de San Francisco (xeralmente 18:00 en Galicia).

Na noticia lémbranse as instrucións para abrir o encontro e máis as ligazóns máis útiles.

Este é un exemplo:

Chess960 WL2020 R4 Pairings

O procedemento de actuación ao ver que se anunciou a rolda é:

comprobar se o outro equipo enviou o desafío na páxina de encontros diarios do Team Galicia (https://www.chess.com/clubs/matches/team-galicia), (aparecería na parte de abaixo)
- se o enviou comprobar que está ben configurado e aceptalo
- se se detecta algún erro, cancelar o desafío e enviar un novo coa configuración correcta (neste caso é mellor acompañar unha mensaxe ao/s representante/s do outro equipo ante a WL, en 2020: WL2020 Teams and representatives
se non o enviou, o envías ti (hai que envialo canto antes mellor e non agardar a que o envíe o outro)
- podes enviar unha mensaxe coa ligazón ao desafío ao representante do outro equipo (sobre todo se pasados un par de días non o aceptaron)
se pasados uns días non aceptaron o desafío ou xurde calquera problema, debes poñelo en coñecemento dos Directores da WL no foro correspondente: WL2020 Match Problems ou Chess960 WL2020 match problems (fanse novos cada ano)

Unha vez aberto hai que anunciar o encontro no grupo Team Galicia para que se apunten os xogadores, e facer seguimento da evolución da inscrición por se hai que insistir porque non chegamos ao mínimo de xogadores requirido ou se vemos que temos unha aliñación feble en comparación coa do outro equipo.

Tamén hai que revisar que non se apunten 'multiplayers' (é boa axuda a web de puremind na sección multiplayers: https://chessteams.info/multiplayers.php e tamén hai un foro no grupo WLHQ, WL2020 Multi-Team Players que eu xa apenas sigo), nin 'cheaters', e revisar os que acumulen derrotas por tempo.

OLLO: só está permitido eliminar da aliñación xogadores que acumulen +25% de perdas por tempo (nos últimos 90 días que amosa chess.com nas estatísticas), ou os multiplayers, ou excepcionalmente xogadores que sexan obxectivamente sospeitosos de ser cheaters (por exemplo, cando vemos unha conta creada moi recentemente e que vemos que xogou moitas partidas nun día para chegar a tempo de inscribirse ou mesmo que as completou rendéndose en poucas xogadas, ou casos así de flagrantes).

Pero NON ESTÁ PERMITIDO eliminar xogadores da aliñación se non responde a un destes motivos.

Non se poden eliminar, por exemplo, os xogadores de baixo rating para mellorar as posibilidades do equipo. (Supón que o match é de mínimo 10 xogadores e tes vantaxe nos 10 primeiros taboeiros, pero tes moitos xogadores de baixo rating que desequilibran o encontro a favor do rival, poderíache interesar eliminalos, pero está prohibido, o importante é que poidan xogar todos os que poidan, non é tan importante gañar como para facer estas cousas. Aínda que a picaresca está aí e sempre hai algún equipo que ves que non se apuntan xogadores de -1500)

Se se detecta que o outro equipo elimina os xogadores de baixo rating, pódese denunciar no foro correspondente: WL2020 Match Problems ou Chess960 WL2020 match problems. Pero é mellor ter probas. Habería que ter feitas capturas de pantalla dos inscritos en días anteriores. (Eu ás veces fágoo cando xogamos contra algún equipo do que teño algunha sospeita, pero normalmente nestes equipos os xogadores de rating baixo xa non se apuntan, probablemente desalentados previamente polos admins que coñecen ben a norma). En calquera caso, as normas de Xogo Limpo aconsellan alentar a todos os xogadores a participar teñan máis ou menos rating e está demostrado que a medio prazo teñen mellores resultados os equipos que fan iso. Un bo exemplo é o Team Scotland contra o que moitas veces gañamos e presentaban contra nós moitísimos xogadores de rating baixo, e agora están competindo na División C da WL que esixe un mínimo de 50 taboleiros tras unha tempada de 2019 moito mellor que as dos últimos anos.

Sobre todo na primeira rolda de cada competición É IMPORTANTE informar aos xogadores que se apuntan nos encontro do Team Galicia e os doutro equipo que SÓ PODEN XOGAR POR UN ÚNICO EQUIPO EN TODA A TEMPADA, é importante que elixan o equipo antes de que comece a primeira rolda e pódeselles tratar de convencer para que o fagan polo Team Galicia. Eu normalmente fágoo dun xeito bastante respectuoso en plan que ao Team Galicia nos vai ben e que estamos encantados de que xogue connosco pero que é libre de elixir. Tamén, nalgún caso como o dun holandés ou dun ucraíno simplemente os informo de que teñen que elixir un só equipo sen máis.

A páxina para seguir a competición, cos resultados e as clasificacións:

https://chessteams.info/ by @puremind

e as ligazóns aos foros do grupo World League dos grupos nos que participa o Team Galicia en 2020, nos grupos formato suízo non é moi útil, pero nos que se xoga formato liga é onde atopamos o calendario de toda a tempada:

WL2020 Division D

Chess960 WL2020 Division B

Outros foros nos que hai que botar unha ollada de cando en vez son algúns nos que se debaten regras ou suxestións para modificar as normas da competición tales que WL2021 Suggestions.

E para actualizar os admins que representan ao Team Galicia ante a WL e saber con que admins que representan aos outros equipos debemos contactar, está o foro WL2020 Teams and Representatives.

Team Galicia HQ

Super Admins

Admins