Qarabağ Azərbaycandır! beynəlxalq şahmat turniri başa çatdı
5-6 dekabr 2020-ci il tarixlərində “Təhsil” Respublika İdman Mərkəzinin təşkilatçılığı, Azərbaycan Respublikası Təhsil Nazirliyi və Azərbaycan Şahmat Federasiyasının dəstəyi ilə keçirilən “Qarabağ Azərbaycandır!” beynəlxalq şahmat turniri başa çatdı. 33 ölkədən 160 şahmatçının qatıldığı yarış çox geniş coğrafi ərazini əhatə edib. Belə ki, Avropadan 15, Asiyadan 13, Afrikadan 1, Şimali Amerikadan 1, Cənubi Amerikadan 3 ölkənin şahmatçıları iştirak edib. Dünyanın 17 yaşadək top şahmatçılarının da qatıldğı yarışda 5 Beynəlxalq Qrossmeyster, 10 Beynəlxalq Usta, 17 Fide Ustası, 26 Ustalığa Namizəd qeydiyyatdan keçib.
Oyunların şəffaflığını təmin etmək məqsədilə “Zoom” proqramı üzərindən nəzarət təşkil olunub. Oyunçular final mərhələsinin bütün oyunlarını təşkilat komitəsi üzvlərinin nəzarəti ilə 2 kamera (ön və arxa) qarşısında oynayıblar.
Sevindiri haldır ki, bu mötəbər yarışda şahmatçılarımız uğurlu çıxış edib. Belə ki, turnirin qalibi həmyerlimiz Xəzər Babazadə olmuşdur. Final mərhələsində 11 oyundan 8,5 xal toplayan Xəzər hamıdan güclü olub. İkinci yerin sahibi 17 yaşadək şahmatçılar arasında dünyanın ən yüksək reytinqli şahmatçısı, özbəkistanlı Nodirbek Abusattarov olub. 3-4-cü yerləri eyni xal toplayan belarusiyalı Denis Lazavik və həmyerlimiz Əhməd Əhmədzadə bölüşdürüb. Əlavə əmsallara görə Denis 3-cü, Əhməd isə 4-cü olub.
Ən yaxşı nəticə göstərən azərbaycanlı nominasiyasında Aydın Süleymanlı 1-ci (ümumi hesabda 6-cı), Məhəmməd Muradlı 2-ci (ümumi hesabda 9-cu) , Şiroğlan Talıbov isə 3-cü (ümumi hesabda 15-ci) yerin sahibi olub.
12 yaşadək şahmatçılar arasında 1-2-ci yerləri Türkiyə təmsilçiləri tutub. Ediz Gürəl 1-ci, Bora Yarar 2-ci yerə sahib çıxıb. 3-cü yerin sahibi isə həmyerlimiz Cahandar Azadəliyev oldu.
Qızlar arasında Qazaxıstan təmsilçisi Assel Lezbekova 1-ci yerə layiq görülüb. 2-ci yerin sahibi həmyerlimiz Mələk İsmayıl olub. 3-cü yerə isə gürcüstanlı Pipiya Yekaterina çıxıb.
Yarışın keçirilməsi məqsəd Azərbaycan Respublikasının ərazi bütövlüyünün bərpa olunmasının qeyd edilməsi, karantin dövründə məktəblilərin asudə vaxtlarının səmərəli təşkili və şahmatçıların müasir texnologiyalardan istifadə etməklə yarış tərcübələrini artırılmasından ibarət idi.
